KORONAHAN NIYO AKO

Di ko na hinangad magkaroon ng tropeyo.

Oh tawagin man sa kahit na anung titulo.

Kampeon na ko, mailabas lang kita sa isipan ko,

Paano ko nasabing panalo na ako?

Nagbayad na ako para sa kahapon, ngayon at bukas,

Hindi ako sigurado sa aking piniling landas,

Ngunit, natitiyak kong may nadagdag akong antas,

Paano ko nasabing panalo na ako?

Tinamaan ko ng banayad ang target ko,

Inasinta, sinakto at sinentro,

Di pa rin ako nawawala sa linya ko,

Paano ko nasabing panalo na ako?

May tiwala ako sa sarili kong kinang,

Mga bituin ay pinilit kong hawakan,

Nagsindi pa rin ako ng liwanag sa gitna ng dilim,

Paano ko nasabing panalo na ako?

Ang realidad ng buhay ay sinasabi ko na,

Kulang pa to at obserbasyon ay dadagdagan ko pa,

Totoong pangyayari’y sinulat ko ng mas malaya na

Paano ko nasabing panalo na ako?

Kokote kong malabo nagkaroon ng maraming letra

Parirala, panitikan at komedya ang aking naibida

“ano bang nakakatawa ngayon” ang tanging entrada,

Paano ko nasabing panalo na ako?

Nagmahal ako sa mga salita ng totoo,

Nalulong sa paglikha ang mga kamay ko,

Ang enerhiya ng pagsulat ay pinalakas ko ,

Paano ko nasabing panalo na ako?

Ang bawat numero sa kalendaryo nagkaron ng ekis,

Mabigat na kaparusan kapag ang kadena ay bumigkis

Ayoko sa bawat araw, mayroon akong mamintis

Paano ko nasabing panalo na ako?

Sa tulong ng talino, nilabanan ko ang sariling takot,

Hamon ng buhay kumportable kong sinuot,

Pagkamalikhain ang aking naging puot,

Paano ko nasabing panalo na ako?

Nagsusulat ako para lang sa sarili ko,

Dahil ang sarili ko ay katulad din ninyo,

Ang buhay na dinanas ko, magkaparehas tayo,

Paano ko nasabing panalo na ako?

Pighati man yan, magsusulat ako,

Sobrang kaligayahan man yan, magsusulat ako,

Unos na humarang, magsusulat ako,

Paano ko nasabing panalo na ako?

Napahagahan ko ang bawat karakter ng istorya,

Lawak ng isip ko ay naging makinarya,

Paano ko nasabing panalo na ako?

Ginawa ko lang ang gusto ko.

Koronahan niyo ako.